ਹੁਣ ਮੋਰਨੀਆਂ ਕੌਣ ਪਾਉਂਦਾ ਐ

ਕੱਚੀਆਂ ਕੰਧਾਂ ਲਿਪ, ਹੁਣ ਮੋਰਨੀਆਂ ਕੌਣ ਪਾਉਂਦਾ ਐ
ਘਰ ਆਏ ਪ੍ਰਾਹੁਣਾ, ਤੇ ਜਲੇਬੀਆਂ ਕੌਣ ਮੰਗਵਾਉਂਦਾ ਐ

ਵਿਆਹ ਮੌਕੇ ਜੋੜ ਮੰਜੀਆਂ ਸਪੀਕਰ ਕੌਣ ਲਾਉਂਦਾ ਐ
ਆਰਕੈਸਟਰਾ ਦਾ ਜੋਰ ਬੜਾ, ਗਾਇਕ ਕੌਣ ਬੁਲਾਉਂਦਾ ਐ

ਪੱਬਾਂ ਦਾ ਸ਼ੌਕ ਪੈ ਗਿਆ, ਹੁਣ ਸੱਥ ਕਿਸਨੂੰ ਭਾਉਂਦਾ ਐ
ਇਸ਼ਕ ਪ੍ਰਫੈਸ਼ਨ ਹੋਇਆ, ਕੀਤੇ ਕੌਲ ਕੌਣ ਨਿਭਾਉਂਦਾ ਐ

ਮਤਲਬ ਦੇ ਯਾਰ ਨੇ ਸਭ, ਹੁਣ ਪੱਗ ਕੌਣ ਵਟਾਉਂਦਾ ਐ
ਹੁਣ ਵਾਰਾਂ, ਲੋਕ ਤੱਥ ਤੇ ਕਲੀਆਂ ਕਿਹੜਾ ਗਾਉਂਦਾ ਐ

ਦੀਏ ਕੱਟ ਕਲੋਨੀ ਬਾਪੂ, ਮੁੰਡਾ ਬਾਪੂ ਨੂੰ ਸਮਝਾਉਂਦਾ ਐ
ਫੇਰ ਵੇਖੀਂ ਪੈਸਾ ਬਾਪੂ ਕਿੱਦਾਂ ਥੱਬਿਆਂ ਦੇ ਥੱਬੇ ਆਉਂਦਾ ਐ

ਲਿਖਣ ਲਿਖਾਰੀ ਹੁਣ, ਜੋ ਗਾਇਕ ਦੇ ਪੈਸੇ ਲਿਖਾਉਂਦਾ ਐ
ਐਸੇ ਵਕਤ 'ਚ ਗੀਤ ਤੇਰੇ ਹੈਪੀ ਕੌਣ ਗਾਉਣਾ ਚਹੁੰਦਾ ਐ